ភ្នំពេញ៖ ប្រេងឥន្ធនៈបានបន្តឡើងថ្លៃបន្តទៀតចាប់ពីថ្ងៃទី១៦ ដល់២៨ ខែកុម្ភៈ ឆ្នាំ២០២២ ដោយប្រេងសាំងធម្មតាមានតម្លៃ ៤ ៧០០រៀល/ លីត្រ និងប្រេងម៉ាស៊ូតមាន ៤ ៤៥០រៀល/លីត្រ។ ឡើងថ្លៃ ២០០រៀលពីតម្លៃមុន។

នេះជាការឡើងថ្លៃប្រេងជាលើកទី៤ជាប់ៗគ្នាក្នុងប្រទេសកម្ពុជាក្នុងរយៈពេល៥សប្តាហ៍ចុងក្រោយនេះ ដោយចាប់ផ្តើមពីថ្ងៃទី១ ខែមករា ឆ្នាំ២០២២។

ក្រសួងពាណិជ្ជកម្មបានបញ្ជាក់ក្នុងសេចក្ដីជូនដំណឹងពីតម្លៃប្រេងនៅថ្ងៃនេះថាការបន្តឡើងនេះគឺដោយសារមានការប្រែប្រួលនៅលើទីផ្សារអន្តរជាតិ។

ក្រសួងបញ្ជាក់យ៉ាងដូច្នេះថា៖ «ក្រសួងពាណិជ្ជកម្មមិនមែនជាអ្នកកំណត់ថ្លៃលក់ប្រេងឥន្ធនៈនៅកម្ពុជាទេ គឺក្រសួងគ្រាន់តែស្រង់តម្លៃឡើង-ចុះ នៃប្រេងតាមទីផ្សារអន្ដរជាតិ មកគណនាតាមប្រកាសដូចមានក្នុងឯកសារយោងខាងលើតែប៉ុណ្ណោះ»។

តារាងតម្លៃចាស់ពីថ្ងៃទី១-១៥ ខែកុម្ភៈ ដោយប្រេងសាំងធម្មតាថ្លៃ ៤ ៥០០រៀល ឬ១,១១ដុល្លារក្នុងមួយលីត្រ និងប្រេងម៉ាស៊ូតតម្លៃ ៤ ២៥០រៀល ប្រហែល១ដុល្លារក្នុងមួយលីត្រ។

យោងតាមទិន្នន័យរបស់ក្រសួងពាណិជ្ជកម្ម តម្លៃសាំងធម្មតានៅថ្ងៃទី១ ខែមករា មានតម្លៃ ៤ ២០០រៀលក្នុងមួយលីត្រ និងម៉ាស៊ូត ៣ ៨០០រៀលក្នុងមួយលីត្រ៕